«Биолог» Прогресс - «Зэкъошныгъ» Мыекъуапэ - 0:1.
ШэкIогъум и 12-м зэдешIагъэх.
Зезыщагъэхэр: А. Гуренко, К. Константинов, Е. Хомченко - зэкIэри Астрахань.
«Зэкъошныгъ»: Колесников, Абаев, Датхъужъ (Мыкъо, 90), Емкъужъ,
Казаков, Сандаков, Жегулин (Такълый, 86), Ешыгуау (Къонэ, 69), Нартиков
(Чалаев, 58), Кузнецов, Лучин (Винников,72).
Къэлапчъэм Iэгуаор дэзыдзагъэр: Артем Казаков - 55.
Зы ешIэгъу къыфэнагъэр
«Зэкъошныгъэм» текIоныгъэр къызэрэдихыгъэм дакIоу ешIакIэу
къыгъэлъэгъуагъэмкIи тигъэгушIуагъ. Бысымхэм шапхъэр зэраукъуагъэм фэшI
гъогогъуищэ судьям афигъэпытагъ. «Зэкъошныгъэм» ифутболистмэ тамыгъэ
гъожьыр зыкIи къафиштагъэп. Тиреспубликэ щапIугъэ ныбжьыкIэхэу А.
Ешыгуаор, А. Къонэр, А. Датхъужъыр, Р. Такълыир тренер шъхьаIэу Р.
Шыумафэм ешIапIэм ригъэхьагъэх - цыхьэ афишIыгъ. «Зэкъошныгъэм»
идиректор шъхьаIэу А. Натхъом къызэрэтиIуагъэу, къэкIощт илъэс ешIэгъум
тикомандэ зыфегъэхьазыры.
Угловоир И. Жегулиным къызетым, тиухъумакIоу А. Казаковыр
шъхьэкIэ Iэгуаом еуи, метри 10 фэдизкIэ зыпэчыжьэ къэлапчъэм дидзагъ.
Бысымхэр амалхэм алъыхъугъэхэми, пчъагъэр зэфэдэ ашIыжьыным
фэхьазырыгъэхэп, хьакIэхэм текIоныгъэр яфэшъуашэу къыдахыгъ.
«Зэкъошныгъэр» шэкIогъум и 16-м «Дагдизель» Каспийск тикъалэ щыIукIэщт. Мы илъэсым тикомандэ ар иаужырэ ешIэгъу.
ЕмтIылъ Нурбый.
